تبلیغات
سرعین بهشت نزدیک - غزال و غزل
تاریخ : چهارشنبه 14 دی 1390 | 02:00 ق.ظ | نویسنده : میثم بهراد

بو گئجه باده ایله دفع ملال ائیله میشم

عؤمرون بیر گئجه سینده بئله حال ائیله میشم

بیز هارا تار هارا،یار رب ،کئجه مئیخانه هارا؟

اونودوپ دردی بو ایامدا مجال ائیله میشم

ساقی نین غمره سی اوخ،مئی جامی اولموش سپریم

فلکین جؤورو ائله جنگ و جدال ائیله میشم

مئی دمیر تک ائله ییب جانیمی،غمله ووروشوم

غم دئمه،دوشمنیمی رستم زال ائیله میشم

آجی ایامی شیرین ائتمگه سرخوش دولانیپ

کؤنلومو ایندی اسیر خط و خال ائیله میشم

گورموشم من اوزونون یاری سینی،تک قاشینی

آی اوزونده نئجه گور سئیر هلال ائیله میشم

گئتمیش هیجران اوروجو گؤرجک هلال قاشلارینی

بایرام اؤلموش بو گؤروش عزم و وصال ائیله میشم 

گورموشم اوزده او زرین تئلی پروانه کیمی

یانمیشام اودلارا،ترک پر و بال ائیله میشم

عشق درسی منه اؤیرتسه ده هیجران غمینی

عشقه دوشمکله بئله کسب کمال ائیله میشم

یاتماییب صوبحه کیمی من گئجه، گون اوزلو یارین

سینه سی گورگوم اؤلوب سیر جمال ائیله میشم

ساقی نین زلفونه عشق باغلاماسا عؤمروم اگر

من بئله درک ائله ییب ،بؤیله خیال ائیله میشم

شهریارا غزل ائتمیش منی جئران ،گؤزلیم

گؤر غزل ایله نئجه صید غزال ائیله میشم.